Twatandukanijwe n’urupfu rw’umwana wacu

Hari ubwo abashakanye bagirana bagirana amakimbirane,aturutse ku bintu bito cyangwa binini ndetse maze bikabaviramo no gusenya urugo iyo umwe atabashije kwihanganira undi,ari nabyo tugiye kumva mu buhamya bw’umubyeyi umwe twaganiriye,mu gahinda kenshi yatewe no kubura imfura ye,maze umugabo akamushinja ko yagize uruhare mu rupfu rw’umwana wabo.

Umurerwa ni umugore umaze amezi 6 atandukanye n’uwo bari barashakanye,nyuma yo gupfusha umwana w’imfura bari barabyaranye.

Umurerwa ati ;’’mu mikurire yanjye nakuze ndi imfubyi mba mu muryango,wanderaga tudafite icyo dupfana kuko sinari nzi ababyeyi banjye nakuze nsanga ndi muri uwo muryango niwo nitaga ababyeyi banjye,ariko maze gukura nkumva abaturanyi bakunda kuvuga ko ngo uwo muryango ari abarozi.

Naje kugera igihe cyo gushyingirwa,nshakana n’umugabo w’umugande tubanza gutura mu Rwanda igihe gito,maze tuza kwimuka yujya gutura iwabo w’umugabo mu gihugu cya Uganda,ariko nawe ayo makuru yuko narerewe mu muryango w’abarozi yari yaramaze kuyamenya,ariko jyewe sinabyemeraga kuko nari ntarabyibonera neza numvaga ko ari urwango rw’abaturanyi babasebya.

twaje kubyarana n’uwo mugabo,maze umwana amaze kugira umwaka musaba ko nazajye kwereka umwana uwo muryango wandeze,abanza kubyanga,ndakomeza ndabimusaba aza kwemera,maze ampa icyumweru kimwe cyo kubasura nkazagaruka,ariko njyenda anyihanangirije ko umwana we nagira ikibazo ntazamugaruka imbere.

Umurerwa avuga ko ngo yaje akabasura agasubira mu rugo nyuma y’icyumweru,maze akigera mu rugo nyuma y’umunsi umwe gusa wa mwana ahita yitaba Imana,maze umugabo ahita amwirukana nta mbabazi.

Mu gahinda kenshi ati ;’’umwana yamaze kwitaba Imana umugabo abwira abantu bari baje gushyingura ko ntakiri umugore we,kandi akaba adashaka no kuzongera kumbona mu maso ye,kuko yavugaga ko namwiciye umwana ngo kandi yari yarambujije kujyayo,anjugunyira imyenda aranyirukana.Mu by’ukuri kubyakira byarananiye mbanza kugira uburwayi bukomeye bw’ihungabana abaturanyi barandwaza,baramunyingingira ngo ambabarire aranga burundu.’’

Nagarutse mu Rwanda nshaka ubuzima,sinasubira muri wa muryango ariko nkakomeza kwinginga umugabo aranga burundu,ndetse ahita ashaka undi mugore nuko nanjye nshaka imibereho ariko nta na rimwe njya nibagirwa agahinda natewe n’urupfu rw’umwana wanjye n’umugabo nakundaga,ndetse numva ntazi igihe nzumva ntuje mu mutima kuko byarananiye kubyibagirwa ndetse nanjye natangiye kumva ko uwo muryango wandeze ari nawo wampekuye kandi numva ntashobora kuwubabarira.’’

Uyu mubyeyi arababaye cyane kubera urupfu rw’umwana we,guhemukirwa n’umuryango yarerewemo ndetse n’umugabo akamujugunya kandi nta ruhare yagize mu kwihekura.

agasaro.com

IBITEKEREZO