Basket : Imikino y’akarere ka 5 mu bagore yegukanywe n’abarundikazi
Mu bagore ikipe yegukanye igikombe k’imikino y’akarera ka gatanu( Zone V) mu bagore ni Berco Star yo mu Burundi nyuma yo gutsinda KCCA yo muri Uganda amanota 63-50, naho Ubumwe yo mu Rwanda ibura umwanya wa 3 nyuma yo gutsindwa na USIU yo muri Kenya amanota 92-60.
Mu makipe yari ahagarariye u Rwanda mu bagore Ubumwe BBC yabaye iya kane, APR BBC ni iya gatanu yo yanatsinzwe imikino ine yose.
Mu bagabo ikipe ya Gezira yo mu Misiri yegukanye irushanwa ry’Akarere ka gatanu (Zone V) itsinze City Oil yo muri Uganda amanota 75-73.
Agace ka mbere katsinzwe na Gezira amanota 17-14, itsindwa aka kabiri 25-12, itsinda agace ka gatatu 24-17 iza gutsinda akanyuma amanota 22-17.
Ikipe ya Espoir yo mu Rwanda yari yatsinzwe muri 1/2 na Gezira, nayo yabashije gutsinda ikipe ya Tiger Head Power ya Uganda kuri 82 – 77 maze yegukana umwanya wa gatatu muri iri rushanwa rya Zone V
Iyo mikino y’Akarere ka gatanu yasojwe kuri uyu wa gatandatu tariki ya 10 Ukwakira 2015, ikaba yaberaga kuri Sitade Amahoro (Petit Sitade) i Remera.
Gracieuse Uwadata