Umumaro w’icyayi cya tisane ku mubiri nuko gitegurwa

Tisane ni icyo kunywa twakwita icyayi gusa yo ikagira umwihariko wuko nta caffeine wayisangamo kuko nta majyani aba arimo. Ni icyo kunywa ushobora gutegura mu buryo bunyuranye bitewe nicyo wifuza.

Itegurwa ite ?

Mu gutegura tisane wifashisha ibyo twakwita nk’ibirungo binyuranye. Hariho n’ibigurwa bitunganyije ariko ibyiza ni ibyo witeguriye. Muri byo ibyo tugiye kuvugaho by’ingenzi wabona bitakugoye ni : umucyayicyayi, umwenya, teyi (rosemary), ibibabi cyangwa ibishishwa by’indimu cyangwa icunga, indabo za hibiscus (reba ku ifoto), indabo za maracuja na tangawizi.

Nkuko turi buze kubibona uvanga bitewe nicyo wifuza kugeraho. Ucanira amazi akabira nuko ugashyiramo kimwe cyangwa byinshi mu byo twavuze ruguru. Ushobora kubikoresha bibisi cyangwa ugakoresha ifu yabyo ikorwa ubivunga umaze kubyanika ku zuba. Ya mazi rero urayayungurura ukanywa bigishyushye. Ubishatse ushyiramo isukari cyangwa ubuki.

Akamaro ku buzima

Teyi (rosemary) ifasha umwijima n’uruhago. Ikaba ifasha kandi mu kuvura inkorora, ibicurane, na asima yoroheje. Inagufasha kuruhuka no kuruhura imikaya.

Umwenya nkuko twabibonye ufasha mu guhangana n’ ibibazo by’amaraso macye, gufungana mu mazuru, ibicurane n’inkorora. Unongera iruba ku bagabo. Si ibyo gusa kuko nawo ufasha mu kunyara neza.

Umucyayicyayi ukura imyanda mu mubiri. Urwanya kandi indwara zo kubyimbirwa, bikongerera umubiri wacu vitamini C. Ku bari mu mihango cyangwa bafite umuriro, uraborohereza. Unafasha kandi kugabanya umuvuduko udasanzwe w’amaraso. Iyo tisane yabyo ihoze wayikoresha mu kuvura imyate n’ibimeme. Uyogeshaho.

Indabo za hibiscus zizwiho kuba zikize kuri vitamini C. ku bw’ibyo zongerera ingufu ubudahangarwa zigafasha mu kurwanya cholesterol mbi no kugabanya umuvuduko udasanzwe w’amaraso. Zinasukura umubiri

Tangawizi izwiho kuba inkabura mu mubiri. Ifasha mu kurwanya isesemi ikanafasha mu igogorwa ry’ibiryo. Ifasha mu kurwanya rubagimpande, goute no kubabara imitsi no mu ngingo.

Ibibabi by indimu cyangwa icunga kimwe n ibishishwa byabyo bizwiho kongerera ubudahangarwa umubiri ; gufasha igifu kugogora ibiryo neza no gutuma umuntu atagira inda ibyimbye. Si ibyo gusa kuko binarwanya ibicurane n’inkorora bikanatwongerera vitamini C.

Indabo za maracuja zifasha mu kurwanya kwiheba no kwigunga, stress ndetse zinafasha umubiri kumva uruhutse neza.

Nujya kuyikora uzavange bitewe nicyo wifuza gusa uzirinde gukoresha byinshi kuko uretse no kukubihira byanateza ibindi bibazo. Kuko ifu ariyo ibasha gupimwa, ukoresha akayiko kamwe mu gikombe (250ml) cy’amazi. Wifuza kuvanga wakoresha igipimo ushaka bitewe nibyo wifuza ko biba byinshi.

Gusa ku mugore utwite ni byiza kubanza kugisha inama umuganga umuri hafi ku byo yemerewe cyangwa atemerewe.

Byatanzwe na Phn, Biramahire Francois

IBITEKEREZO